monumenta.ch > Hildegardis Abbatissa > salCod.Sal.X,16.161 > Psalmi, 7 > salCod.Sal.X,16.166 > bsbClm6224.130 > csg48.30 > sectio > ad Corinthios I, 16 > sectio 19 > bnfGrec107.617 > sectio 13 > bnf9389.56 > bnfGrec107.67 > bnf9389.347 > bnf10439.244 r > Exodus, 17 > csg75.497 > bnf10439.240 r > 89 > bsbClm6224.75 > bnf17226.174 > csg75.726 > sectio 25

Word Selection for Searching

Report an Error in this Sectio
Hildegardis Abbatissa, Visiones, 2, 5, 25
Sed quia virginitas tam gloriosa ante Deum est, ideo quia eam ex voluntate sua Deo obtulerunt, eam prudenter conservent, quoniam hoc sanctum propositum cum summa devotione virginitatis susceptum, fideliter custodiendum est. Unde etiam qui idem sacramentum adierunt, caveant ne retrorsum incedant. Nam ipsi charissimi imitatores filii mei sunt, cum se ita Deo offerunt ut non sint ligati in opinione coniugii, nec onerati saeculari causa carnalem copulam respuentes, ne illi cum omni sollicitudine carnis suae subiecti sint; sed hoc cupientes ut gloriosae innocentiae innocentis Agni adhaereant. Quapropter vir ille qui in animo suo deliberat ut nullam costam sibi copulet, sed hoc desiderat ut in pudore virginitatis propter amorem Filii mei perseveret, sodalitatem eius accipiet, si tamen in operibus ipsius castitatis perseveraverit, quia haec sancta munera, in voto sacratissimi pacti ecclesiasticae religionis ob gloriam supernae remunerationis eidem Filio meo obtulit.